Azərbaycan, Bakı / Trend müxbir İ.Xəlilova / Azərbaycan banklar assosiasiyası (ABA) ekspert qruplarının fəaliyyətinin təşkili planının işlənilməsinə başlayıb. Bu qrupların yaradılması haqda qərar ABA-nın iyulun 17-də qurumun 2007-2011-ci illərdə əsas fəaliyyət istiqamətlərinə və institusional inkişafına həsr olunmuş konfransında qəbul edilib. Bazar ertəsi qurumun icraçı direktoru Fərhad Əliyevin bildirdiyinə görə, prioritetdən asılı olaraq ekspert qrupları müxtəlif istiqamətlərdə yaradılacaq. Bunlar marketinq, informasiya texnologiyaları, hüquq və digər istiqamətlərdir.
Onlar həmçinin tematik alt qruplara, bankların miqyasına görə bölünə bilər. Əliyevin sözlərinə görə, həmçinin konkret istiqamət üzrə bütün sualların bir böyük qrupa daxil ediləcəyi də istisna deyil. Ehtiyacların müəyyənləşdirilməsi və kommersiya təşkilatlarının prioritetlərinin üzə çıxarılması üçün assosiasiya banklar arasında sorğu keçirdikdən sonra qiymətləndirici sənəd hazırlamağı planlaşdırır.
Ekspert qruplarının vəzifəsinə tövsiyyələrin hazırlanması və onların ABA tərəfindən müvafiq orqanların diqqətinə çatdırılması, qanun layihələrinin yaxud da normativ-hüquqi aktlara dəyişikliklərin hazırlanması daxildir.
