Azərbaycan, Bakı / Trend / Əmanətlərin Sığortalanması Fonduna 30 bank üzvdür. Bu barədə fonddan bildiriblər. Onların arasında "Xalq bank", "AtaBank", Azərbaycan Beynəlxalq Bankı, Mikromaliyyələşdirmə bankı, "Azərdəmiryolbank", "Melli İran Bankı", "Azər-Turk Bank", "Bank of Azerbaijan", "Bank of Baku", "Bank Respublika", "Kapital Bank", "BANK STANDARD", "Azeriqazbank", "Muganbank", "Nikoyl", "Pakistan Milli Bankı"nın filialı, "Rabitabank", "Royal Bank of Baku", "Texnikabank", "Turanbank", "UNİBank " kommersiya bankı, "Yapı Kredi Bank Azerbaijan", "Zaminbank", "Parabank" səhmdar kommersiya bankı, "Gəncə" səhmdar kommersiya bankı, "Amrahbank" səhmdar bankı, "United sredit bank", "Azerneqliyyatbank", Atrabank və "Dekabank" var.
Banklar tərəfindən ödənilən üzvlük haqqı 10 min manat təşkil edir. Hər bir üzv-banka müvafiq şəhadətnamə verilir. Azərbaycanın hüdudlarından kənarda yerləşən bankların filiallarındakı əmanətlər sığorta olunmayacaq və onlarla bağlı kompensasiya ödənilməyəcək.
Azərbaycanın "Əmanətlərin sığortalanması haqqında" qanununa əsasən, əgər üzv-bank məcburən bağlanılsa, bankrot elan edilsə, yaxud da məhkəmənin qanunvericiliyə əsasən əmanətlərlə bağlı öhdəliklərə moratoriyin tətbiqi haqda qərarı qüvvəyə minsə, fond əmanətçiyə kompensasiyanın ödənilməsinə dair təminat verəcək.
Bankrot olan bankın əmanətçiləri qaydalara əsasən, il ərzində fonda müraciətlərini ünvanlaya bilərlər. Müraciətin verilməsindən 90 gün ərzində əmanətçiyə kompensasiya ödənilməlidir. Bütün hallarda elanın çap olunmasından beş il ərzində əmanətçinin kompensasiyanın alınmasına dair hüququ qalır.
