Azərbaycan, Bakı/ Trend / Azərbaycan Respublikası Dövlət Neft Şirkəti (ARDNŞ) N. Nərimanov adına neft-qazçıxarma idarəsinin tərkibinə daxil olan yataqlarada qaz hasilatını iki dəfə, yəni,
indiki 2 mln. kubmetrdən 4 mln. kubmetrə qədər artırmaq niyyətindədir. Bu barədə cümə axşamı ARDNŞ-dən verilən məlumatda belə deyilir.
Bu idarə Bakının qaza olan tələbatının yarısından çoxunu təmin edir. Hazırda Bakının qaza olan tələbatı sutkada 2,5 mln. kubmetr təşkil edir (qışda bu göstərici təxminən 5 dəfə artır).
Hasilatın artırılması ARDNŞ-in qazın hasilatının artırılması üzrə proqramı ilə nəzərdə tutulub. 2008-2010-cu illərdə bu idarənin tərkibinə daxil olan yataqlarda 13 yeni quyu qazılacaq.
Beş quyu "8 Mart" yatağından qazılacaq. Üç quyu 5800 metr dərinliyində qazılacaq. Geoloqların hesablamalarına görə, quyuların hər birinin sutkalıq debiti 400 minr kubmetr təşkil edəcək.
Yerdə qalan qaz və qaz-kondensant quyuları "Səngəçal-Duvannı dəniz- Xaara-Zirə" bloklarında və "Ələt dəniz" yatağından qazılacaq.
Qazma işləri "Azeri Drilling Company" BM ilə həyata keçiriləcək. Hazırda BM tərəfindən "8 mart" yatağında qazma işləri həyata keçirilir. Quyunun layihə dərinliyi 5800 metr təşkil edir (hazırda 4800 metr dərinliyində qazılıb). Qazma işləri ilin sonuna qədər başa çatdırılacaq.
"Azeri Drilling Company" birgə müəssisəsinin təsisçiləri ARNDŞ (35%), "Target Petroleum Azerbaijan Corporation" (35%), "First Drilling Limited" (Şotlandiya)(30%) şirkətləridir.
Müəssisənin fəaliyyət sahəsinə neft və qaz quyularının qazılması, quyuların sementlənməsi və möhkəmləndirilməsi, əsaslı və yeraltı təmir, geofiziki , tədqiqat və perforasiya daxildir.
