Azərbaycan, Bakı/ Trend müxbir S.Əliyev/ Bu gün Bakıda, Azərbaycanın quru ərazisindəki "Kürsəngi-Qarabağlı" yatağından neft hasil edən ən iri əməliyyat şirkəti "Salyan Oil"in İdarə Komitəsinin iclası keçiriləcək. Bu barədə bazar ertəsi şirkətdən bildiriblər. Şirkətdə xarici kapital da iştirak edir. Görüş çərçivəsində əməliyyat şirkətinin növbəti il üçün büdcəsinin təsdiqlənməsi gözlənilir. Güman edilir ki, büdcə bu ilin büdcəsindən az olacaq. Bu ilin büdcəsi 43 mln. dollar təşkil edib. Şirkət 2008-ci ildə istismar olunan yataqlarda iki istismar quyusu qazmaq niyyətindədir. Quyulardan biri "Qarabağlı" digəri "Kürsəngi" yatağında qazılacaq. Hər iki quyu istismar xarakterli olacaq. Quyuların dərinliyi 3500 metr təşkil edəcək. Bu qərar şirkətin İşçi Komitəsinin iclasında qəbul edilib. Bu il şirkət biri kəşfiyyat xarakterli olmaqla ümumilikdə 6 quyu qazıb (biri ötən ildən keçid). "Kürsəngi-Qarabağlı" yatağının istismar müddəti 25 ildir. Layihənin səhmdarı olan ARDNŞ 50% iştirak payına malikdir. İki Çin şirkəti - China National Oil & Gas Exploration and Development Corp. (CNODC) və CNPC ( Hong Kong) Ltd. (CNPCHK) hər biri 25% iştirak payına malikdir.
...