Azərbaycan, Bakı,19 yanvar / Trend / Yanvar-noyabrda Azərbaycan quru və dəniz yataqlarında əməliyyat aparılması üçün 213,4 min ton müxtəlif metal borular idxal edib. Bu 2006-cı ilin yanvar-noyabr aylarına nisbətdə 40,6 faiz arıb. Dövlət Statistika Komitəsindən (DSK) verilən məlumata görə, göstərilən dövr ərzində 311 mln. dollar hacmində boru idxal olunub ki, bu da 2006-cı ilin analoji dövrü ilə müqayisədə 60,1 faiz çoxdur.
DSK-dən bildiriblər ki, yanvar-noyabr ərzində neft-qaz kəmərləri üçün 77,1 min ton boru idxal olunub ki, bu da 2006-cı ilin analoji dövrünə nisbətdə 47,2 faiz çoxdur. Yanvar-noyabr aylarında 122 mln. dollar həcmində neft-qaz boru kəmərləri idxal olunub. Bu həcm 2006-cı ilə nisbətdə 40,6 faiz çoxdur.
DSK-dən həmçinin vurğulayıblar ki, yanvar-noyabrda 16,9 min ton qazma boruları alınıb. Bu göstərici 2006-cıı ilin analoji dövrünə nisbətdə 31,8 faiz azdır. Bu məhsul idxalının ümumi həcmi 34,6 mln. dollar təşkil edib ki, bu 2006-ci il ilə müqayisədə 11,8 faiz azdır. Azərbaycanda nefq-qaz əməliyyatları ilə Azərbaycan Dövlət Neft Şirkəti, PSA tipli müqavilə üzrə xarici şirkətlər və xarici kapitala malik ARDNŞ BM məşğul olur.