Azərbaycan, Bakı, 04 iyun / Trend , müxbir A.Bədəlova/ İraq tikintisi 2012-ci ildə başa çatacaq "Nabukko" boru kəməri ilə Avropaya qaz ixracatçısı kimi çıxış edə bilər. Bu barədə çərşənbə günü Türkiyənin energetika nazirinin müavini Yusuf Yazar Bakıda keçirilən "Neft və Qaz, Neft emalı və Neft- kimya" 15 beynəlxalq yubiley konfransında çıxış edərkən bildirib. Sərgi və konfrans "Iteca Caspian" şirkəti tərəfindən təşkil olunub.
Onun sözlərinə görə, İraq qazı Türkiyəyə çatdırıla, oradan isə "Nabukko" boru kəməri ilə ixrac oluna bilər.
"İraq qazı "Nabukko" qaz kəməri üçün mümkün ehtiyat mənbələrindən biri ola bilər", - deyə nazir müavini bildirib.
Yazarın sözlərinə görə, hazırda Türkiyə İraqla "Nabukko" üzrə qaz tədarükü imkanlarını müzakirə edir.
Qaz "Nabukko" boru kəməri ilə Azərbaycan və Mərkəzi Asiyadan keçməklə, Avropa Birliyi ölkələrinə tədarük olunacaq. Qaz Mərkəzi Asiyadan "Nabukko"yadək Xəzərin dibi ilə çəkilməsi planlaşdırılan TransXəzər qaz kəməri ilə çatdırıla bilər. İlkin nəql imkanları təxminən ildə səkkiz mlrd. kub metr olacaq boru kəməri 2012-ci ilə qədər tikiləcək. İlk tədarük 2013-cü ildə başlanacaq.
