Azərbaycan, Bakı, 04 iyun/ Trend , müxbir E.İsmayılov/ Almaniyanın Wintershall AG şirkəti operator qismində Azərbaycanın qaz yataqlarının işlənilməsində iştirak etmək arusunda olduğunu bildirib. Bu barədə çərşənbə günü Bakıda "Neft və Qaz, Neft emalı və Neft-kimya" XV beynəlxalq konfransda çıxış edən Wintershall AG-nin prezidenti Devid Branson məlumat verib. Sərgi və konfrans İteca Caspian şirkəti tərəfindən təşkil edilib.
Branson bildirib ki, yeni qaz yataqlarının gələcək kəşfiyyatı risksiz deyil, lakin "potensial qaz yataqları tapmaq mümkündür".
"Dörd-beş il ərzində burada qaz yataqlarının işlənilməsində iştirak edəcək daha dörd-beş yeni şirkət görməyə ümid edirəm və biz onlarla fəal əməkdaşlıq edəcəyik", - Branson bildirib.
2006-cı ilin sonunda Almaniyanın Wintershall şirkəti Azərbaycanın Dövlət Neft Şirkəti ilə "Əşrəfi" yatağının işlənilməsi məsələsi üzrə Anlaşma memorandumu imzalayıb. İlkin qiymətləndirmələrə görə, yatağın ehtiyatı 35-40 mln. ton neft və 20-25 mlrd. kubmetr qaz təşkil edir.
"Əşrəfi-Dan Ulduzu" perspektivli strukturların işlənilməsinə dair müqavilə 1996-cı il dekabrın 14-də imzalanıb. Layihənin iştirakçıları - BP - 30 faiz, Unocal - 25,5 faiz, Itochu - 20 faiz, Delta Hess - 4,5 faiz, ARDNŞ - 20 faiz. Sonralar müqavilənin təsiri dayandırılıb.
Müəlliflə əlaqə saxlamaq üçün elektron ünvan: [email protected]
