Azərbaycan, Bakı, 23 iyun / Trend / Nazir Natiq Əliyevin rəhbərlik etdiyi Azərbaycanın Sənaye və Energetika Nazirliyinin nümayəndə heyəti Ciddədə (Səudiyyə Ərəbistanı) keçirilən neft istehsalçıları və istehlakçılarının ənənəvi sammitində ilk dəfə iştirak edib. Bu barədə bazar ertəsi nazirlikdən yayılan məlumatda bildirilib.
Əliyev sammitdə məruzə ilə çıxış edib. Görüş zamanı tərəflər dünya bazarında neft və neft məhsullarının bahalaşma tendensiyalarını müzakirə ediblər.
Sammit Səudiyyə Ərabistanının kralı Abdulla bin Abdulaziz əl Saudun sədrliyi altında keçirilib. Görüşdə 36 ölkədən, həmçinin dünyanın 25 ən iri neft şirkətlərindən və Beynəlxalq Enerji Agentliyi və Beynəlxalq Valyuta Fondu daxil olmaqla bir sıra beynəlxalq təşkilatlardan nümayəndələr iştirak ediblər.
Səfər zamanı Azərbaycanın sənaye və energetika nazirini Nazirlik Aparatının rəhbəri Rasim Məmmədov müşayiət edir.
