Azərbaycan, Bakı, 12 avqust / Trend , müxbir E.İsmayılov/ Gürcüstanın Qara dəniz Poti limanının fəaliyyəti bu gün səhər Bakı vaxtı ilə 08:00-da bərpa olunub. Bu barədə çərşənbə axşamı Trend -a telefonla Poti limanının Marketinq və İnvestisiyalar Departamentinin rəhbəri Zviad Çxartişvili bildirib.
Limanın fəaliyyəti Cənubi Osetiyada aparılan silahlı münaqişə nəticəsində Rusiya təyyarələri tərəfindən bombardımana məruz qalması səbəbindən dayandırılmışdı.
"Limanın işi bu gün səhər saat 8-də bərpa olunub, hazırda liman normal rejimdə fəaliyyət göstərir", - deyə Çxartişvili bildirib.
Onun sözlərinə görə, liman sutkada 12 saat (səhər saat 8-dən axşam saat 8-dək) fəaliyyət göstərəcək, məlum hadisələrə qədər isə liman 24 saat fəaliyyət göstərirdi. "Belə bir qərar ölkədə yaranan vəziyyətlə əlaqədar qəbul olunub", - deyə Çxartişvili söyləyib.
Gürcüstanın Qara dəniz sahillərində yerləşən Poti limanı müxtəlif tipli yüklərin, o cümlədən Xəzərin şərq sahillərindən Azərbaycan ərazisi vasitəsilə keçirilən duru neft məhsullarının daşınması ilə məşğul olur.
Limanın neft terminalının gücü ildə doqquz mln. ton təşkil edir.
Limanın fəaliyyəti bazar günü axşam, Bakı vaxtı ilə təqribən saat 19:00-da dayandırılıb. Aparılan bombardıman nəticəsində liman kommunikasiyalarının enerji təchizatı sistemi sıradan çıxıb. Hazırda bütün sistemin işi bərpa olunub. Bombardıman nəticəsində neft terminalı və dəmir yoluna zərər dəyməyib.
Məqalə müəllifi ilə əlaqə ünvanı: capital
