Azərbaycan, Bakı, 27 avqust / Trend / Azərbaycan Dövlət Neft Şirkəti (ARDNŞ) "Günəşli-13" platformasında yüksək debitli quyu istismara verib, - çərşənbə günü ARDNŞ-in yaydığı məlumatda deyilir.
Quyunun dərinliyi 2860 metr təşkil edir. Onun sutkalıq debiti 120 ton neft və 45 min kub metr səmt qazıdır.
"Günəşli-13" platforması 2004-cü ilin mayında istismara verilib. Dörd il ərzində orada dörd quyu qazılaraq istifadəyə verilib. Bu quyuların sutkalıq debiti 1,7 mln. kub metr qaz, 690 ton neft və 205 ton kondensatdır.
Yanvar-iyulda "Günəşli" yatağının dəniz platformasından 3 mln. tondan çox neft və 3,7 milyard kub metr qaz hasil edilib.
"Günəşli" dəniz neft-qaz yatağının dayaz hissəsini işləyən ARDNŞ-in "28 May" Neft-Qaz Çıxarma Idarəsinin gündəlik hasilatı 14 495 ton neft və 17,7 mln. qaz təşkil edəcək. ARDNŞ-in hasil etdiyi neftin 60 faizi və qazın 80 faizi bu NQÇ-nin payına düşür.