Azərbaycan, Bakı, 26 sentyabr/ Trend / Yaponiyanın JCCP Tədris Mərkəzi SOCAR şirkətinin (Azərbaycanın Dövlət Neft Şirkəti) mütəxəssislərini Mərkəzin Yaponiyada təşkil etdiyi ixtisasartırma tədris kurslarında iştirak etməyə dəvət edib, -SOCAR-ın Ekologiya İdarəsinin rəsmi İnternet-saytında yerləşdirilən məlumatda bildirilir.
Kurslarda iştirak haqqında təklif Yaponiyanın Tədris Mərkəzinin nümayəndə heyətinin Bakıya səfəri zamanı səslənib. Səfər zamanı Mərkəzin nümayəndələri "Azneft" Istehsalat Birliyinin və Azərbaycanın neft emalı müəssisələrinin mütəxəssisləri ilə görüşüblər.
JCCP 1981-ci ildən fəaliyyət göstərən dövlət təşkilatıdır və Yaponiyanın neft şirkətləri tərəfindən maliyyələşdirilir. İndiyədək neft sənayesində çalışan müxtəlif sahənin təxminən 17000 mütəxəssisi bu təşkilatda təhsil alıb. JCCP özünün 4700-dək məruzəçisini dünyanın müxtəlif ölkələrinə ezam edib.
