Azərbaycan, Bakı, 17 noyabr/ Trend / Azərbaycanda 2008 - ci ilin yanvar - oktyabrında təqribən 37,8 mln. ton neft və kondensat hasil edilib ki, bu da 2007- ci ilin müvafiq dövr göstəricisindən 7,6 faiz çoxdur. Bu barədə Azərbaycan Dövlət Statistika Komitəsindən məlumat verilib.
Yanvar - oktyabrda neft hasilatının əsas həcmi Azərbaycan Beynəlxalq Əməliyyat Şirkətinin (ABƏŞ) payına düşüb. Şirkət "Azəri - Çıraq - Günəşli" dəniz yataqları blokundan 30,6 mln. ton neft və kondensat hasil edib ki, bu göstərici ötən ilin analoji dövr göstəricisindən 10,1 faiz çoxdur.
Yanvar - oktyabrda Azərbaycanda qaz hasilatı 19 mlrd. kubmetr təşkil edib ki, bu da 2007-ci ilin müvafiq dövr göstəricisindən 48,1 faiz çoxdur. Bu həcmin 7,1 mlrd. kubmetri ABƏŞ -in payına düşüb; 2007-ci ilin analoji dövr göstəricisindən 70,1 faiz çox.
Yanvar - oktyabrda Azərbaycanda 16,4 mlrd. kVt/saatdan çox elektrik enerjisi istehsal olunub. Bu rəqəm 2007-ci ilin on ayı ərzində istehsal olunan elektrik enerjisinin həcmindən 1,2 faiz azdır.
