Azərbaycan, Bakı, 18 noyabr/ Trend , müxbir A.Bədəlova/ ""Şimal axını" qaz kəməri Avropanın qaz idxalına tələbatını 25 faiz ödəməyə imkan verəcək", - Şimali Avropa Qaz Kəmərinin ("Şimal axını") çəkilməsi üzrə Nord Stream AG Konsorsiumunun maliyyə direktoru Pol Korkoran (Paul Corcoran) çərşənbə axşamı Moskvada altıncı "Rusiya qazı-2008" beynəlxalq forumunda çıxış edərkən bildirib.
Onun sözlərinə görə, "Şimal axını" sabitlik və təhlükəszilik baxımından Avropanın enerji siyasəti ilə tam uyğundur.
"2009 - cu ilin dekabrında sonuncu icazə alınmalıdır və 2010 - cu ilin aprelində qaz kəmərinin çəkilməsinə başlanılacaq", - Korkoran bildirib. İcazələrin alınması proseduru İsveçdən başlayıb. Qarşıdakı aylarda Rusiya, Danimarka, Fransa, Almaniya ilə bu prosesi davam etdirmək planlaşdırılır.
Yaxın həftələrdə şirkət layihə üzrə Estoniya, Latviya, Litva, Polşa ilə məsləhətləşmələri başa çatdırmaq niyyətindədir. Korkoranın sözlərinə görə, qaz kəmərinin birinci xətti ilə qazın ixracı 2011 - ci ilin dördüncü rübündə, ikinci xətt üzrə 2012 - ci ildə başlayacaq.
"Şimal axını" - Rusiya və Almaniya arasında Baltik dənizinin dibi ilə çəkiləcək qaz kəməridir. Kəmərin çəkilməsi haqqında saziş 2005 - ci il sentyabrın əvvəlində imzalanıb.
Layihənin dəniz hissəsinin operatoru -- Nord Stream AG. Nord Stream AG - nin səhmdarları aşağıdakılardır: "Qazprom" (51 faiz), BASF (20 faiz), E.ON Ruhrgas (20 faiz), Gasunie (9 faiz). Qaz kəmərinin gücü ildə 55 mlrd. kubmetrə bərabər olmalıdır. "Şimal axını"nın qəbul edilmiş layihəsinə əsasən, qaz kəməri Finlandiya, İsveç və Danimarkanın ərazi sularından keçəcək.
Müəlliflə əlaqə saxlamaq üçün elektron ünvan: с[email protected]
