Azərbaycan, Bakı, 27 noyabr/ Trend , müxbir A.Bədəlova/ "Nabukko" qaz kəməri layihəsi üzrə hökumətlərarası saziş 2009 - cu ilin birinci yarısında Ankarada imzalanacaq", - deyə Macarıstan parlament komitəsinin xüsusi iclasında Bolqarıstanın layihədəki xüsusi nümayəndəsi Dimitr İkonomov bildirib. Bu barədə MTI - Econews yazır.
Macarıstanın "Nabukko" layihəsi üzrə xüsusi nümayəndəsi Mihay Bayerin (Mihly Bayer) sözlərinə görə, boru kəməri üzrə istismar və hüquq rejimini nəzərdə tutan hökumətlərarası saziş layihəsinin hazırlanması yekun mərhələdədir.
Bayer əlavə edib ki, dünya maliyyə və iqtisadi böhranı layihəyə hələ ki, təsir göstərməyib..
Onun sözlərinə görə, hökumətlərarası sazişin imzalanması tarixi, əsasən,Türkiyədən asılıdır. Bayer noyabrın ortalarında Bakıda keçirilən enerji sammitində iştirak etmiş Türkiyə nümayəndələrinin "Nabukko" layihəsinin reallaşdırılması üçün Ankaranın siyasi iradəyə malik oluduğu bəyan etdiklərini bildirib.
Dəyəri $12,4 mlrd. olan "Nabukko" qaz kəməri ilə 2013 - cü ildən Azərbaycan və Mərkəzi Asiyadan Avropa İttifaqı ölkələrinə qaz ixrac etmək nəzərdə tutulur. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər birinin bərabər miqdarda - 16,67 faiz paya malikdir..
Məqalə müəllifi ilə əlaqə ünvanı - [email protected]
