...

Bakı enerjipaylayıcı şəbəkə ilk dəfə şəhəri dairəvi enerji təchizatı sistemi ilə təmin edəcək

Energetika Materials 12 Fevral 2009 14:16 (UTC +04:00)

Trend-i buradan izləyin

Azərbaycan, Bakı, 12 fevral / Trend , müxbir E.İsmayılov/ 2009-cu ilin ikinci yarısında "Bakıelektrikşəbəkə" ASC (Azərbaycan paytaxtında elektrik enerjisinin satışı və paylanması) Bakıya ilk dairəvi enerji verilməsi sistemini başa çatdıracaq", - ASC-nin mətbuat xidmətinin rəhbəri Tanrıverdi Mustafayev deyib. Bu sistemin yaradılması üzrə işlər ötən ilin ikinci rübündə başlanıb.

"2009-cu ildə bu sistemin yaradılması üzrə işlər davam etdiriləcək. İşlərin bu ilin sonuna, bəlkə də ortalarına qədər başa çatdırılması gözlənilir", - Mustafayev bildirib.

"Dairəvi sistemin yaradılması paytaxtı fasiləsiz və kəsilmədən enerji ilə tam təmin etmək imkanı verəcək. "Biz bunu daha tez etməyə çalışacağıq, çünki Bakı böyüyür və inkişaf edir. Şəhərin inkişafı ilə yanaşı onun enerji şəbəkəsi də inkişaf etməlidir. Bu, yeni müəssisələr, yaşayış kompleksləri, mehmanxanaların təminatı üçün vacibdir", - ASC-nin mətbuat xidməti vurğulayıb.

Onun sözlərinə görə, 2009-cu ildə "Müşfiq" (220 kilovolt) və "Bayıl" (110 kilovolt) yarımstansiyaları, eləcə də bu yarımstansiyalar arasında dairəvi hava elektrik ötürücüsü xəttinin istismara verilməsi planlaşdırılır. Həmçinin 2009-cu ildə 110 kilovoltluq "Liman", "İçərişəhər" və 227 saylı yarımstansiyaları da istismara vermək planlaşdırılır.

Bütün bu tədbirlər ASC-nin 2007-2009-ci illərdə inkişaf proqramı çərçivəsində həyata keçirilir.

2008-ci ildə "Bakıelektrikşəbəkə" paytaxtın elektrik şəbəkəsinin gücünü 3877 meqavolt/amperə qədər artırıb. 2007-ci ildə bu rəqəm 3701 meqavolt/amper olub. 2006-cı ildə şəbəkənin gücü 2848 meqavolt/amper olmuşdu.

2006-2008-ci illər ərzində ASC tərəfindən 109 transformator məntəqəsi tikilib, 246-da əsaslı təmir aparılıb. Əhalinin elektrik enerjisi ilə təminatının yaxşılaşdırılması üçün 720 yeni transformator quraşdırılıb.

Elektrik şəbəkəsinin inkişafı üçün dövlət büdcəsindən 2008-ci ildə 120 milyon manat ayrılıb. Bir il əvvəl bu rəqəm 57,9 milyon manat təşkil etmişdi. 2006-cı ildə isə bu məqsədlər üçün 12 milyon manat ayrılmışdı.

"Elektrik şəbəkəsinin yenidən qurulması üçün ASC-nin şəxsi büdcəsindən 88 milyon manat ayrılıb", - Mustafayev əlavə edib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti