Azərbaycan, Bakı, 30 aprel / Trend , müxbir S.Əliyev /
Azərbaycanda "Azəri-Çıraq-Günəşli" (AÇG) yataqları blokunun operatoru olan BP şirkəti neft hasilatı həcmini sutkada 900 min barel səviyyəsinə çatdırıb. Bu göstərici ötən ilin sentyabrında "Mərkəzi Azəri" platformasının fəaliyyəti dayandırılanadək hasil edilən həcmə bərabərdir. Bu barədə Azərbaycanın neft sənayesindəki mənbə bildirib.
Yataqlarda hasilat "Mərkəzi Azəri" yatağında əməli olaraq bütün quyuların (12-dən 11-i) istifadəyə verilməsi hesabına bir neçə dəfə artıb.
Payızdan başlayaraq bu yataqlar blokunda hasilat azaldılıb. AÇG-nin işlənməsi üzrə operator BP sentyabrın 17-də "Mərkəzi Azəri" yatağında neft hasilatını dayandırıb və yataqda quraşdırılan platforma personalını dənizdə qazın aşkar olunması səbəbindən evakuasiya edib.
2008-ci ildə Azərbaycanın Xəzər dənizində yerləşən "Azəri-Çıraq-Günəşli" yataqları blokundan təqribən 34 mln. ton yüngül neft hasil edilib. Ötən il AÇG-də illik orta sutkalıq hasilat 688,5 min barel təşkil edib.
"Azəri-Çıraq-Günəşli" yatağından Bakı-Tbilisi-Ceyhan və Bakı-Supsa neft kəmərləri ilə ixrac edilən Azeri Light növlü neft hasil edilir.
Məqalə müəllifi ilə əlaqə ünvanı: [email protected]
