Azərbaycan, Bakı, 27 may / Trend , müxbir S.Əliyev /
Bu il Azərbaycanda cari il üçün proqnozlaşdırılan 45 milyon tona nisbətdə təqribn 50 milyon ton neft hasil olunacaq. Bu barədə çərşənbə günü Azərbaycanın neft-qaz sənayesindəki mənbə bildirib. Bu il hasilat həcmi "Azəri-Çıraq-Günəşli" yataqları blokunda yaranan problem nəzərə alınaraq proqnozlaşdırılıb.
"Lakin "Mərkəzi Azəri" yatağında problemin aradan qaldırılması üzrə işlər çətinli olmadan aparıldı ki, bu da bu il hasilatın proqnozlara nisbətdə artacağı barədə danışmaq imkanı verir", - deyə mənbə bildirib.
Ötən il planlaşdırılan hasilat həcmi 52 milyon dollar səviyyəsində proqnozlaşdırılmışdı, lakin "Azəri" yatağının ("Azəri-Çıraq-Günəşli" yataqları bloku layihəsi çərçivəsində xarici şirkətlər konsorsiumu tərəfindən istismar edilən) mərkəzi hissəsində hasilatın dayandırılması səbəbindən bu göstəriciyə nail olmaq mümkün olmadı. Ötən ilin yekunu üzrə hasilat 44,5 mln. ton təşkil edib.
"Mərkəzi Azəri" platforması ötən il sentyabrın 17 - də dənizdə, platforma yaxınlığında qaz tullantılarının aşkar edilməsi səbəbindən dayandırılıb. Hazırda "Azəri-Çıraq-Günəşli" yataqları blokunda hasilat tam olaraq bərpa olunub və sutkada 900 min barel neftə çatdırılıb ki, bu da platformada hasilat dayandırılanadək olan həcmə bərabərdir.
Azərbaycanın sənaye və energetika naziri Natiq Əliyev bildirmişdi ki, Azərbaycanın bir neçə il ərzində hasilatın artırılması üçün böyük potensialı var. Respublika ildə 65 mln. ton neft hasil edə bilər.
Məqalə müəllifi ilə əlaqə ünvanı: [email protected]