Azərbaycan, Bakı, 18 avqust / Trend /
Bu ilin altı ayı ərzində "Şahdəniz" dəniz qaz-kondensat yatağında hasil edilən Azərbaycan qazının Cənubi Qafqaz boru kəməri ilə (Bakı-Tbilisi-Ərzurum) nəqlinin orta sutkalıq həcmi 17 milyon kubmetr (neft ekvivalentində 99 min barel) təşkil edib. Bu barədə BP-nin (layihənin texniki operatoru) məlumatında deyilir.
Yanvar-iyun aylarında Cənubi Qafqaz boru kəməri layihəsinin kapital xərcləri bir milyon dollar təşkil edib. 2009-cu ildə Cənubi Qafqaz boru kəmərinin kapital xərclərinin 2008-ci ildəki 22 milyon dollara nisbətdə 15 milyon dollar təşkil edəcəyi gözlənilir.
Boru kəməri 2006-cı ilin sonundan etibarən istismara verilib, onun vasitəsilə qaz Azərbaycan və Gürcüstana çatdırılır, 2007-ci ilin iyulundan etibarən isə Azərbaycanda "Şahdəniz" dəniz qaz-kondensat yatağının işlənməsi layihəsinin birinci mərhələsi çərçivəsində Türkiyəyə nəql olunur.
Cənubi Qafqaz boru kəmərinin iki operatoru var: BP - texniki operator, boru kəmərinin tikintiləri və onların istismara verilməsinə məsuliyyət daşıyır; StatoilHydro - kommersiya operatoru, Cənubi Qafqaz boru kəmərinin biznes inkişafı və inzibati məsələlər üzrə məsuliyyət daşıyır.
Cənubi Qafqaz boru kəmərinin səhmdarları: ВР (texniki operator - 25,5 faiz), StatoilHydro (kommersiya operatoru - 25,5 faiz), Azərbaycan CQB Limited (10 faiz), LUKOYL (10 faiz), NICO (10 faiz), Total (10 faiz) və TRAO (9 faiz).
