Qazaxıstan, Astana, 26 avqust / Trend , müxbir K.Konırova /
ABŞ Qazaxıstanın Xəzər vasitəsilə neft nəqli sistemi üzrə layihəsinə istənilən siyasi dəstəyi verməyə hazırdır. ABŞ Dövlət Depatamentinin Avrasiya enerji məsələləri üzrə xüsusi nümayəndəsi Riçard Morninqstar Trend -ın Astanadakı xüsusi müxbirinə belə deyib.
"Bizim fikrimizcə, bu olduqca səmərəli layihədir və biz ona istənilən siyasi dəstəyi verməyə hazırıq", - Morninqstar deyib.
Onun sözlərinə görə, QXNS və XBK-nın genişlənməsi neftin Xəzər regionundan daşınması üçün real üsuldur.
Qazaxıstanda işlənib hazırlanmış neftin ixracı üçün marşrutlardan biri olan İskənə-Kurık neft kəməri Qazaxıstanın Xəzər vasitəsilə neft nəqli sisteminin bir hissəsini təşkil edir. Bundan əlavə, İskənə-Kurık neft kəməri QXNS çərçivəsində Xəzər dənizinin Qazaxıstan sahillərində neft-tökmə terminallarından, tanker və gəmilərdən, Xəzər dənizinin Azərbaycan sahillərində neft daşıma terminallarından və Bakı-Tbilisi-Ceyhan neft kəmərində birləşdirici qurgu sistemlərindən təşkil ediləcək transxəzər sistemini yaratmaq planlaşdırılır.
"Biz həmçinin Türkmənistandan Xəzərə də qaz kəməri olacağına ümid edirik. Türkmənistan Prezidenti artıq Avropaya qaz verməyə hazır olduqlarını bəyan edib. Lakin layihənin reallaşması üçün müəyyən tədbirlər görmək lazımdır", - ABŞ Dövlət Departamentinin xüsusi nümayəndəsi deyib.
Onun sözlərinə görə, Türkmənistan quruda və suda hasilatı artırmalıdır.
Bundan əlavə, Türkmənistan və Azərbaycan belə boru kəmərinin mövcudluğu haqqında razılığa gəlməli və aralarında olan bütün məsələləri həll etməlidirlər.
"Biz belə layihənin reallaşmasının mümkünlüyünü tam dəstəkləyirik. Maliyyə yardımına gəlincə isə, ABŞ hökuməti tərəfindən heç bir subsidiya gözlənilməməlidir", - Morninqstar deyib.
"Amerikanın idxal-ixrac bankı, xaricdə investisiya üzrə Korporasiyası kimi maliyyə agentlərini layihəyə cəlb etmək potensial olaraq mümkündür. Amerikanın Ticarət və İnkişaf Agentliyi layihənin texniki iqtisadi əsaslandırılmanın işlənib hazırlanmasına dəstək verməyə hazırdır. ABŞ-ın iştirakçısı olduğu beynəlxalq maliyyə institutları da layihəyə öz köməklərini göstərə bilərlər. İstənilən halda bu layihə özəl ticarət təşkilatları vasitəsilə həyata keçməlidir", - Dövlət Departamentinin nümayəndəsi deyib.
Məqalə müəllifi ilə əlaqə ünvanı: [email protected]
