Azərbaycan, Bakı, 18 sentyabr / Trend /
Yanvar-avqust aylarında ARDNŞ-nin (Azərbaycan Respublikası Dövlət Neft Şirkəti) Neft-Qaz Çıxarma idarələri ölkənin offşor və onşor yataqlarından təxminən 36 milyon barel neft (təxminən 4,9 milyon ton) hasil ediblər. 2008-ci ilin yanvar-avqustunda bu göstərici təxminən 36,4 milyon barel təşkil edib. Bu barədə ARDNŞ-dən bildirilib.
ARDNŞ-nin xarici şirkətlərlə birgə layihələrinin payına 9 milyon barel düşür. Ondan əməliyyat şirkətlərinə 1,25 milyon barel, "Azəri-Çıraq-Günəşli" (AÇG) layihəsinin payına təxminən 7,1 milyon barel, "Şahdəniz" yatağından qaz-kondensatın payına 702,5 min barel düşür.
Yanvar-avqustda ARDNŞ təxminən 5,06 milyard kubmetr qaz əldə edib. Ötən ilin müvafiq dövründə bu göstərici 5,15 milyard kubmetrdən çox olub. ARDNŞ-nin Neft-Qaz Çıxarma idarələri bu dövrdə 4,7 milyard kubmetr qaz hasil ediblər. Quruda qaz çıxaran birgə müəssisələr və əməliyyat şirkətləri yanvar-avqustda ARDNŞ-yə təxminən 45 milyon kubmetr qaz veriblər.
Azərbaycan Beynəlxalq Əməliyyat Şirkəti (ABƏŞ) AÇG yatağında yanvar-avqustda ARDNŞ üçün təxminən 2,7 milyard kubmetr səmt qazı çıxarıb. Ötən ilin analoji dövründə bu göstərici 1,1 milyon kubmetr olub.
Azərbaycanda 57 neft-qaz yatağı var. Onlardan 18-i dənizdə, qalanları quruda yerləşir. ARDNŞ əməkdaşlarının ştat sayı 62 mindən çoxdur.