Azərbaycan, Bakı, 8 oktyabr / Trend , müxbir E.İsmayılov/
Dünya iqtisadi-maliyyə böhranına baxmayaraq, Bakı Beynəlxalq Ticarət Limanından daşınan yüklərin həcmində azalma müşahidə edilməyib, cümə axşamı limandakı mənbə deyib.
Mənbənin dediyinə görə, nə neft, nə də quru yüklərin daşınma həcmində azalma müşahidə edilməyib.
Mənbənin sözlərinə görə, bu ilin sonunadək liman keçən ilki göstərici səviyyəsində müxtəlif yüklər realizə edəcək. Keçən il Bakı limanından 6 milyon tona yaxın müxtəlif yüklər daşınıb. Keçən il göndərilən yüklərin həcminin 3 milyona yaxını neft və neft məhsullarının, qalan 3 milyonu isə bərə nəqliyyatı ilə hərəkət edən yüklərin payına düşüb. (Bakı-Türkmənbaşı, Türkmənbaşı-Bakı, Bakı-Aktau, Aktau-Bakı)
"Mən düşünürəm ki, bu ilki səviyyə keçən ildəki kimi olacaq, azalma olmayacaq. Bu, 3 milyona yaxın neft və neft məhsulları və 3 milyona yaxın bərə nəqliyyatı ilə hərəkət edən yüklərdir. Neft və neft məhsullarının daşınma həcmi keçən il olduğu kimidir, daşınmaların həcmində nəzərəçarpan azalma yoxdur", - mənbə belə deyib.
Əgər əvvəllər Bakı-Aktau xətti ilə neft yüklərinin daşınması yalnız Xəzər Dəniz Gəmiçiliyinin gəmiləri ilə həyata keçirilirdisə, indi bu daşımalar KASPAR və Kazmortransflot şirkətlərinin gəmiləri ilə də həyata keçirilir. "Qazaxıstan tankerləri də neft və neft məhsulları daşıyır, bunların bir hissəsi bizim Dübəndidəki neft terminalında boşaldılır, bir hissəsi isə Bakı limanından Sanqaçal terminalına gedir və əlbəttə ki, biz bu tankerlərə müvafiq liman xidmətləri göstəririk", - mənbə belə deyib.
Dövlət Statistika Komitəsinin məlumatına görə, yanvar-avqust aylarında Bakı Beynəlxalq Dəniz Limanından 3,3 milyon ton yükboşaltma işləri həyata keçirilib.
Məqalə müəllifi ilə əlaqə ünvanı: [email protected]