Azərbaycan, Bakı, 27 oktyabr / Trend /
ARDNŞ oktyabrda Bakı-Novorossiysk boru kəməri ilə təxminən 240 min ton neft ötürüb, ötən ilin analoji dövründə bu göstərici 83,7 min ton təşkil edib. Bu barədə çərşənbə axşamı hökumətdən bildirilib.
Yanvar-sentyabr aylarında şirkət Bakı-Novorossiysk şimal boru kəməri ilə 1,85 milyon tondan çox neft ixrac edib, 2008-ci ilin analoji dövründə isə bu göstərici təxminən 948 min ton təşkil edib.
Sentyabrda bu neft boru kəməri ilə təxminən 140 min ton neft ixrac edilib, ötən ilin analoji dövründə təxminən 83 min ton olub.
2009-cu ildə ARDNŞ Bakı-Novorossiysk boru kəməri ilə neft ixracını 2008-ci ildəki 1,3 milyon tona nisbətdə 2,5 milyon tona kimi artırmaq niyyətindədir.
2007-ci ildə bu marşrut üzrə təxminən 1,2 milyon ton neft ixrac olunub ki, bu da 2006-cı ildəki göstərici ilə eynidir. 2005-ci ildə Bakı-Novorossiysk boru kəməri ilə ixrac 1,6 milyon ton təşkil edib.
Bakı-Novorossiysk boru kəməri ilə ARDNŞ-ın öz yataqlarında hasil etdiyi, həmçinin Azərbaycanda quruda işləyən birgə müəssisələrin və əməliyyat şirkətlərinin nefti ixrac olunur.
