Azərbaycan, Bakı, 31 oktyabr / Trend /
Avropa şirkətləri İran ilə ölkənin "Nabukko" kəmərinə qoşulması üzrə qeyri-rəsmi müzakirələrə başlayıb, bu barədə İranın Milli Qaz İxracı Şirkətinin direktoru Rza Kesaizadə bildirib, MEHR agentliyi xəbər verib.
Kesaizadənin sözlərinə əsasən, "Nabukko" boru kəməri iki mərhələdə tikiləcək. Birinci mərhələnin inşasına 2011-ci ildə, ikinci mərhələnin inşasına isə 2014-cü ildə başlanılması planlaşdırılır. İkinci mərhələnin həyata keçirilməsi ilə bu boru kəməri vasitəsilə ildə 30 milyard kubmetr qaz nəqli imkanı yaranacaq.
"Nabukko" boru kəməri ilə ildə 30 milyard kubmetr qaz nəql olunmazsa, bu boru kəmərinin inşası iqtisadi cəhətdən sərfəli olmayacaq", - o bildirib.
Onun sözlərinə əsasən, İran qazı olmadan "Nabukko" boru kəmərinin həyata keçirilməsi mümkün deyil. "Hazırda bəzi Avropa şirkətləri İranın bu boru kəmərinə qoşulması üzrə qeyri-rəsmi müzakirələrə başlayıb", - Kesaizadə qeyd edib.
Dəyəri 7,9 mlrd. avro olan "Nabukko" kəməri ilə Xəzər regionu və Yaxın Şərqdən Aİ ölkələrinə qazın ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botaş və Almaniyanın RWE şirkətləridir. Onların hər biri bərabər paya - 16,67 faiz paya malikdir. Layihənin ümumi dəyərinin təxminən 30 faizi layihədə iştirak payı əsasında Nabucco Gas Pipeline International-ın səhmdarları tərəfindən ödəniləcək, qalan 70 faizi isə kreditorların hesabına maliyyələşdiriləcək.