Azərbaycan, Bakı, 12 noyabr / Trend , müxbir A.Bədəlova /
OPEK dünyanın neftə olan tələbatının 2010-cu ildə sutkada 0,75 milyon barel artaraq 85,07 milyon barelə çatacağını proqnozlaşdırır. Ötən ayda OPEK dünyanın neftə olan tələbatının artımını sutkada 0,7 milyon barel səviyyəsində proqnozlaşdırıb.
OPEK-in neft bazarı üzrə noyabr məruzəsində deyildiyi kimi, yüksək neft qiymətləri ilə yanaşı dünya iqtisadiyyatının zəif bərpası növbəti ildə dünyanın neftə olan tələbatının artımının zəifləməsi amillərinə xidmət edə bilər.
Növbəti ildə neft tələbatının ümumi həcminin sutkada 45,71 milyon bareli İqtisadi Əməkdaşlıq və İnkişaf Təşkilatı (İƏİT) ölkələrinin payına düşəcək ki, bu göstərici 2009-cu ilə nisbətdə sutkada 0,13 milyon barel aşağıdır. ABŞ-da neftə olan tələbat sutkada 23,67 milyon barel təşkil edəcək ki, bu da 2009-cu ilə nisbətdə 0,23 milyon barel çoxdur.
OPEK-in dünyanın neftə olan tələbatı üzrə proqnozları bu il dəyişilməz qalıb. 2009-cu ilin yekunlarına əsasən, kartel dünyanın neftə olan tələbatının sutkada 1,4 milyon barel azalaraq sutkada 84,31 milyon barelə çatacağını proqnozlaşdırır. İƏİT ölkələrinin neftə olan tələbatı bu ildə 1,76 milyon barel azalaraq sutkada 45,84 milyon barelə çatıb.
OPEK-in proqnozlarına görə, ABŞ-da neftə olan tələbatın azalması sutkada 0,74 milyon barel təşkil edəcək. Proqnozlara əsasən, keçmiş Sovet İttifaqı ölkələri bu il sutkada 3,96 milyon barel neft sərf edəcək.
Məruzədə deyildiyi kimi, dünyanın neft tədarüklərinin həcmi oktyabrda sutkada 85,35 milyon barel təşkil edib ki, bu da ötən aydakı tədarüklərin həcmindən 0,7 milyon barel çoxdur. OPEK-in neft tədarüklərinin ümumdünya tədarüklərində payı kartelin qiymətləndirməsinə əsasən, ötən ay cüzi azalaraq 34 faiz təşkil edib.
Məqalə müəllifi ilə əlaqə ünvanı: [email protected]