Azərbaycan, Bakı, 09 yanvar / Trend , müxbir E.İsmayılov/
2010-cu ildə ARDNŞ Gürcüstan bazarında 415 min ton neft məhsulları satmağı planlaşdırır. 2009-cu ildə bu göstərici 406 min tondan artıq olub. Bu barədə ARDNŞ-nin Gürcüstanda törəmə şirkəti olan SOCAR Energy Georgia şirkətindəki mənbə bildirib.
"Bu il 415 min ton neft məhsullarının satışı həyata keçirmək planlaşdırılır. Bu həcmin 45%-i benzinin payına düşür", - mənbə deyib.
Onun sözlərinə görə, 2009-cu ildə Gürcüstan bazarında satılan Azərbaycanın neft məhsullarının ümumi həcmindən 190,5 min tonu benzinin, 174 min tonu dizel yanacağının, 30 min tonu aviasiya kerosininin, 7,17 min tonu neft bitumunun, 4,5 min tonu isə mazutun payına düşüb.
"Azərbaycanın neft məhsulları Gürcüstan bazarının təxminən 60-70%-ni tutur", - daha əvvəl SOCAR Energy Georgia-nın rəhbəri Mahir Məmmədov bildirib.
Neft məhsulları Azərbaycanda gücü 20 milyon ton olan 2 NEZ-in bazasında istehsal edilir. Hər iki zavod ARDNŞ-nin tərkibinə daxildir.
Ötən il Bakı NEZ-də 6,03 milyon ton neft məhsulları emal edilib. 2008-ci ildə bu göstərici 7,35 milyon ton olub. ARDNŞ prezidenti Rövnəq Abdullayev daha əvvəl demişdi ki, 2010-cu ildə şirkət 6,6 milyon tona yaxın neft emal etməyi planlaşdırır.
