Azərbaycan, Bakı, 23 fevral / Trend /
2010-cu ilin ikinci yarısında ARDNŞ (Azərbaycan Respublikası Dövlət Neft Şirkəti) Xəzərin Azərbaycan sektorunda "Neft Daşları" yatağında yeni platformanı istismara verməyi planlaşdırır. Bu barədə ARDNŞ-in çərşənbə axşamı yaydığı məlumatda bildirilir. İşlər hasilatın həcminin ildə 1,2 milyon tonadək artırılması məqsədilə aparılır.
12 quyunun qazılması üçün nəzərdə tutulan "Neft Daşları-2521" platforması suyun 24 metr dərinliyində quraşdırılacaq. Platformanın tikintisində baş podratçı olan "Neftqaztikinti" tresti burada 36 nəfərlik ikimərtəbəli yaşayış binasının inşasını başa çatdırıb.
Həmçinin dördbloklu "Neft Daşları -2585" platformasının inşasına dair işlər davam etdirilir. Heydər Əliyev adına Dərin Özüllər Zavodunda platformanın iki bloku artıq tikilib və rənglənib. Yaxın vaxtlarda bu bloklar layihə sahəsinə göndəriləcək. Platforma suyun 46 metr dərinliyində yerləşəcək. Hazırda zavod platformanın üçüncü blokunun inşasına dair işləri həyata keçirir.
Son üç ildə "Neft Daşları" yatağında 72 quyu üçün nəzərdə tutulan dörd platforma tikilərək istismara verilib. Onlardan ən böyüyü 36 quyu üçün nəzərdə tutulan "Neft Daşları -1887"-dir. Artıq platformada 22 quyu qazılıb. Onlardan hər gün 400 ton neft çıxarılır.