Azərbaycan, Bakı, 29 mart / Trend /
ARDNŞ (Azərbaycan Respublikası Dövlət Neft Şirkəti) Azərbaycanın Qusar rayonu ərazisində yerləşən "Şirvanovka" kompressor stansiyasının bərpası işlərini 2010-cu ilin sonuna kimi başa çatdırmağı planlaşdırır. Bu barədə ARDNŞ-nin bazar ertəsi yayılan məlumatında deyilir.
Stansiya Azərbaycan qazının Rusiya Federasiyasına ixrac edilməsinin təmin olunmasında mühüm əhəmiyyət daşıyır.
Məlumatda deyildiyi kimi, hazırda stansiyada quraşdırılmış qazötürücü aqreqatların yeni parametrlərlə istismar olunması üçün yenidənqurma, təmir-bərpa və modernləşdirmə işləri həyata keçirilir. Stansiyada qazötürücü aqreqatların iş rejiminin iki pilləli olması sutkada 10 milyon kubmetr təbii qazın Rusiya Federasiyasına nəql edilməsinə şərait yaradacaq.
"Şirvanovka" kompressor stansiyası 1994-cü ildən istismar olunmur.
Azərbaycan qazının Rusiyaya alqı-satqısına dair ortamüddətli müqavilə 2009-cu il oktyabrın 14-də Bakıda imzalanıb. 2010-2014-cü illəri əhatə edən müqaviləyə əsasən, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə qaz tədarükünün həcmi göstərilməyib. ARDNŞ bir il əvvəlcədən qarşı tərəfi tədarük edə biləcəyi həcm barədə məlumatlandıracaq.
Azərbaycan qazının Rusiyaya nəqli 2010-cu ilin yanvarından başlanıb.
Bu il Rusiyaya bir milyard kubmetr Azərbaycan qazı ixrac olunacaq. Həmçinin, ARDNŞ və Qazprom 2011-ci ildə Rusiyaya nəql ediləcək qazın həcmi barədə razılığa gəliblər. Növbəti ildə bu göstərici təxminən iki milyard kubmetr təşkil etməlidir.