Azərbaycan, Bakı, 9 iyun /Trend, müxbir S.Süleymanov/
"Bakı-Tbilisi-Ceyhan" boru kəməri üzrə tərəfdaşlar qazax neftinin nəqli tarifləri ilə bağlı "Tengizşevroyl" (Qazaxıstanda "Tengiz" yatağının işlənməsi üzrə operator) şirkəti ilə danışıqlar aparırlar. Bu barədə ARDNŞ-nin yüksək vəzifəli nümayəndəsi bildirib.
2008-ci ilin oktyabrında ABŞ-ın Chevron şirkəti Tengiz neftinin BTC ilə nəqlinə başlayıb. Lakin ötən ilin sonlarından qazax neftinin bu boru kəməri ilə nəqli dayandıdrılıb.
Bu gün bu yataqdan neft Azərbaycan ərazisindən keçməklə dəmiryol vasitəsilə Gürcüstanın Qara dəniz limanlarına daşınır.
2008-ci ilin oktyabrından Azərbaycan ərazisindən "Tengiz" yatağından 5,5 milyon ton qazax nefti nəql olunmuşdu. Bu dövrdə Tengiz nefti həm BTC ilə, həm də Azərbaycan-Gürcüstan dəmiryolu ilə nəql edilib.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz); Total (5 faiz); Itochu (3,40 faiz); Inpex (2,50 faiz); ConocoPhillips (2,50 faiz) və Amerada Hess (2,36 faiz).
