Azərbaycan, Bakı, 28 iyul /Trend, müxbir S.Süleymanov/
"Transəfqan" qaz kəmərinin (Türkmənistan-Əfqanıstan-Pakistan-Hindistan) çəkilişi kommersiya baxımından kifayət qədər maraqlıdır. Bu barədə çərşənbə günü Astanada ABŞ Dövlət Departamentinin Avrasiya enerji məsələləri üzrə xüsusi elçisi Riçard Morninqstar bildirib.
Onun sözlərinə görə, lakin bu layihə təhlükəsizlik baxımından sual doğurur.
"Bu, nəzərdən keçirilməyə layiq layihədir. Kommersiya baxımından aydındır ki, kifayət qədər maraqlıdır, lakin həlli zəruri olan təhlükəsizlik məsələləri var", - Morninqstar deyib.
"Əgər təhlükəsizlik məsələləri həll edilsə - lakin burada "əgər" üzrə böyük sual yaranır - bu, bütün ölkələr üçün maraqlı layihə olacaq", - ABŞ-ın xüsusi elçisi vurğulayıb.
Hələ 1990-cı illərin əvvəllərindən müzakirə olunan "Transəfqan" qaz kəməri layihəsi üçün maneə Əfqanıstanda gedən hərbi əməliyyatların davam etməsidir.
Qaz kəmərinin uzunluğu 1 680 kilometr, layihə üzrə gücü isə ildə 30 milyard kubmetr təbii qaz təşkil etməlidir. Marşrut Herat, Qəndəhar (Əfqanıstan) və Kvetta (Pakistan) ərazisindən keçməklə Türkmənistanın "Dövlətabad" yatağından Hindistan-Pakistan sərhədindəki Fazlakaya kimi planlaşdırılıb.
İtaliyanın aparıcı neft-qaz şirkəti "Eni"nin rəhbəri Paulo Skaroni bu yaxınlarda şirkətin Türkmənistan, Qazaxıstan və İrandan Pakistan, Hindistan və Çinə qaz nəql etməsi barədə niyyətini bildirib.
