...

ARDNŞ Xəzərdə yeni platforma üçün blokların tikintisi üzrə işləri başa çatdırır

Energetika Materials 19 Oktyabr 2010 17:03 (UTC +04:00)

Azərbaycan, Bakı, 19 oktyabr /Trend, müxbir E.İsmayılov/

Yaxın günlərdə ARDNŞ-nin Heydər Əliyev adına Dərin Özüllər Zavodu "Neft Daşları-2585" platformasının üçüncü blokunun tikintisi üzrə işləri başa çatdıracaq. Bu barədə çərşənbə axşamı ARDNŞ-dəkı mənbə deyib.

"20 gün ərzində son blokun tikintisi çərçivəsində işlər başa çatdırılacaq. Buna qədər zavodun tikdiyi iki blok quraşdırılmaq üçün artıq dənizə göndərilib", - mənbə bildirib.

Onun sözlərinə görə, platformanın dördüncü bloku Zığ qəsəbəsində yerləşən "Neftqaztikinti" trestinin tikinti-montaj meydançasında tikilir.

"Bu blokun tikintisi hələ ki başa çatmayıb", - mənbə qeyd edib.

Hündürlüyü 64 metr olan platforma suyun 46 metr dərinliyində, beşbloklu "Neft Daşları-1887" platformasının 500 metrliyində yerləşəcək. Yeni platformada 12 quyunun qazılması nəzərdə tutulub. Bu quyulardan sutkada 580 ton neftin hasil edlməsi planlaşdırılır.

Yeni platformalar "Neft Daşları" yatağında neft hasilatının stabil həcminin qorunması və onların ildə 1,2 milyon tona çatdırılması üçün lazımdır. "Neft Daşları" Azərbaycanın karbohidrogenlərin hasilatına başladığı ilk dəniz yatağıdır.

ARDNŞ prezidenti Rövnəq Abdullayevin əvvəlcə dediyi kimi, Azərbaycanın "Neft Daşları" dəniz neft-qaz yatağının çıxarıla bilən qalıq ehtiyatları 182 milyon ton neftdən çoxdur. Bu yatağın geoloji ehtiyatları 365 milyon ton həcmində qiymətləndirilir. Mənimsənilmə üzrə mövcud layihəyə uyğun olaraq, "Neft Daşları" yatağının işlənməsi 2035-ci ildə başa çatmalıdır.

Xəbər lenti

Xəbər lenti