Azərbaycan, Bakı, 30 dekabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) 2011-ci ildə Azərbaycanda istehsal edilən neft məhsullarının 40 faizini ixrac etməyi planlaşdırır. Bu barədə cümə axşamı ARDNŞ-nin yüksəkvəzifəli nümayəndəsi deyib.
Onun sözlərinə görə, şirkət 2011-ci ildə 6,4 milyon ton neft emal etmək niyyətindədir. Emal nəticıəsində alınmış mıhsulun 60 faizi ölkənin daxili tələbatlarını ödəmək üçün göndəriləcək, 40 fazi isə ixrac ediləcək.
ARDNŞ nümayəndəsinin dediyinə görə, gələn il şirkət neft emalının dərinliyini 93-94 faiz səviyyəsində proqnozlaşdırır.
"Şəffaf neft məhsullarının hasilatı 70-73 faiz səviyyəsində gözlənilir", - şirkət nümayəndəsi vurğulayıb.
Onun sözlərinə görə, gələn il ölkədə istehsal edilən neft məhsullarının ümumi həcmindən 10 faizə qədəri aviasiya yanacağının, 22 faizi avtomobil benzininin, 35-36 faizi isə dizel yanacağının payına düşəcək.
ARDNŞ 2010-cu ilin yanvar-noyabrında özünün iki neft emalı zavodunda avtomobil benzini, dizel yanacağı, neft bitumu, koks və LPG daxil olmaqla, 4,66 milyon ton əsas neft məhsulu istehsal edib. Keçən ilin analoji dövründə şirkət 4,25 milyon ton neft məhsulu istehsal edib. Cari ilin yanvar-noyabrında neft məhsullarının istehsal artımı 9,6 faiz və ya 2009-cu ilin yanvar-noyabrına nisbətdə 408 min ton təşkil edib.