Azərbaycan, Bakı, 7 yanvar /Trend/
2010-cu ildə Bakı-Tbilisi-Ceyhan (BTC) ixrac boru kəməri ilə 37 milyon ton neft nəql edilib. Bu göstərici 2009-cu ildə 36,2 milyon ton olub. Bu barədə ARDNŞ-nin cümə günü yaydığı məlumatda deyilir.
Ümumiyyətlə, kəmər istifadəyə verilən gündən 2011-ci il yanvarın 1-ə qədər BTC-yə 143,5 milyon ton neft vurulub.
2010-cu ildə Türkiyənin Ceyhan limanından dünya bazarlarına 37,3 milyon ton neft çıxarılıb. 2009-cu ildə bu göstərici 36,3 milyon ton təşkil edib. Ümumiyyətlə, BTC istismara verilən gündən 2011-ci il yanvar ayının 1-ə qədər Ceyhan limanından 141,9 milyon ton Azərbaycan nefti dünya bazarlarına gəndərilib.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci il mayın 18-də başlanılıb.
BTC-nin tikintisi dörd milyard dollara başa gəlib. Bu, inşaat işlərinə, boru kəmərinin doldurulmasına çəkilən xərclər və maliyyə xərcləridir. Bank faizlərinin ödənilməsi bura daxil deyil. Maliyyə kreditinin ümumi həcmi 2,6 milyard dollar təşkil edir.
BTC-nin səhmdarları BP (30,1 faiz), AzBTC (25 faiz), "Chevron" ( 8,90 faiz), "Statoil" (8,71 faiz), TPAO (6, 53 faiz), "Eni" (5 faiz), "Total" (5 faiz), "Itochu" (3,40 faiz), "Inpex" (2,50 faiz), "ConocoPhilips" (2,50 faiz) və "Hess" (2,36 faiz) şirkətləridir.
