Azərbaycan, Bakı, 22 yanvar / Trend, müxbir S.Əliyev /
2011-ci ildə Azərbaycanda neft hasilatı 2010-cu ildəki 50,83 milyon tona qarşı 51,5 milyon ton həcmində proqnozlaşdırılır. Bu barədə şənbə günü respublikanın neft-qaz bazarındakı mənbə bildirib.
Neft hasilatında əsas həcmin - 40,2 milyon ton neftin ARDNŞ-nin (Azərbaycan Respublikası Dövlət Nedt Şirkəti) iştirakı ilə xarici şirkətlər konsorsiumunun işlədiyi "Azəri-Çıraq-Günəşli" dəniz yataqları blokundan əldə olunacağı güman edilir. Layihənin operatoru BP şirkətidir.
2011-ci ildə ARDNŞ-nin xarici şirkətlərin iştirakı olmadan hasil edəcəyi neftin həcminin 8,45 milyon ton olacağı ehtimal edilir.
2,4 milyon tona yaxın kondensat Xəzərin Azərbaycan sektorundakı "Şahdəniz" qaz-kondensat yatağından hasil olunacaq.
2011-ci ildə Bakı-Novorossiysk neft kəmərilə iki milyon tona yaxın, Bakı-Supsa neft kəməri ilə isə dörd milyondan artıq neftin nəql olunacağı, ARDNŞ-nin tərkibinə daxil olan iki Bakı NEZ-lərına emal olunmaq üçün altı milyon tona yaxın xammal göndərilməsi gözlənilir. Əvvəlki illərdə olduğu kimi neft ixracını əsas həcmi Bakı-Tbilisi-Ceyhan neft kəmərinin payına düşəcək.
"Azəri-Çıraq-Günəşli" layihəsinin iştirakçıları aşağıdakılardır: BP (operator - iştirak payının 34,43 faizi), "Chevron" (11,27 faiz), ARDNŞ (10 faiz), INPEX (10,96 faiz), "Statoyl" (8,56 faiz), "ExxonMobil" (8 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).