Azərbaycan, Bakı, 23 fevral /Trend, müxbir V.Javoronkova/
"Nabukko" qaz kəmərinin dəyəri bahalaşacağı halda belə, Avropa Komissiyası onu dəstəkləməkdə davam edəcək. Çünki bu layihənin reallaşması onun Xəzər regionundakı qaza birbaşa çıxışını təmin edəcək. Bu barədə Aİ nümayəndələri bildiriblər.
"Avropa Komissiyası kimi biz də "Cənub dəhlizi" layihələrindən biri kimi "Nabukko"nu dəstəkləyirik, çünki o bizə Xəzər regionundakı qazdan birbaşa istifadə imkanı verir", - Brüsseldən Trend-ə telefonla energetika üzrə Avropa komissarı Günter Ottingerin nümayəndəsi Marlen Xoltsner bildirib.
Qaz kəmərinin iqtisadi səmərəliliyinə gəlincə, onun sözlərinə görə, "Nabukko" özəl şirkətlərin iştirak etgdikləri özəl layihədir.
"Onlar xərcləri hesablamalı və bu layihənin investisiyalaşdırılması haqqında sərbəst şəkildə yekun qərar qəbul etməlidirlər. Onlar, həmçinin bu layihənin onlar üçün nə dərəcədə sərfəli olduğunu da özləri aydınlaşdırmalıdırlar", - Xoltsner bildirib.
Nümayəndənin sözlərinə görə, Avropa Komissiyası layihənin səhmdarları ilə maliyyə institutları arasındakı danışıqlar prosesində iştirak etməyəcək, çünki bu özəl layihədir və onun maliyyələşdirilməsi üçün özəl sektordan və özəl banklardan pul alınması məsələsi təsisçi şirkətlərin özlərinin vəzifələridir.
Lakin bir qədər əvvəl ictimai bank olan Avropa İnvestisiya Bankı bildirib ki, "Nabukko"nun tikintisi üçün kreditin bir hissəi bu bank tərəfindən ayrıla bilər.
"Beləliklə, Avropa bankından alınması planlaşdırılan vəsaitin bir hissəsi artıq var. Layihənin özəl sektor və özəl banklardan almağa ehtiyacı olduğu vəsaitlərə gəlincə, bu, şirkətlərin öz işidir", - Xoltsner bildirib.
Xəzər və Yaxın Şərq regionundan Aİ ölkələrinə qaz nəqlini nəzərdə tutan "Nabukko" layihəsinin dəyərinə artan istiqamətdə yenidən baxıla bilər. Bu barədə bir az əvvəl "EUbusiness" portalı "Nabuco Gas Pipeline International" konsorsiumunun icraçı direktoru Reynhard Mitçekin sözlərinə istinadən yazıb.
Mitçekin sözlərinə görə, İranın nüvə proqramı ilə bağlı beynəlxalq gərginlik "Nabukko" qaz kəmərinin çəkilişini İrandan zəngin qaz ehtiyatlarına malik olan İraqa yönəltmək barədə qərarın qəbul edilməsinə səbəb olub.
"Bu, üstəlik 550 kilometrin əlavə olunmasıdır ki, bu da qaz kəmərinin ümumi uzunluğunun 3900 kilometrtəşkil etməsi deməkdir", - Mitçek bildirib.
Konsorsium belə dəyişiklikləri rəsmən təsdiqləməsə də, qaz kəmərinin dəyərinin (7,9 milyard avro) qiymətləndirilməsinə boru kəmərinin uzunluğunun artırılması nəticəsində artan istiqamətdə yenidən baxıla bilər.
2010-cu ilin avqustunda Ankarada "Nabukko" layihəsi iştirakçılarının rəhbər komitəsinin son iclasında xəttin qazla təchizatı konsepsiyasında dəyişiklik edilməsi barədə razılaşmaya nail olunub. Layihə iştirakçıları tərəfindən boru kəmərinin Türkiyə-Gürcüstan və Türkiyə-İraq sərhədindən qazla təchizatının iki xətti təsdiqlənib.
İndiyədək boru kəmərinin ümumi uzunluğu 3300 kilometr qiymətləndirilirdi.
Qaz kəmərinin çəkilişi 2012-ci ilə təyin edilib. İlk tədarüklərə 2015-ci ildə start veriləcək. Boru kəmərinin maksimal gücü ildə 31 milyard kubmetr qaz təşkil edəcək.
"Nabukko" qaz kəmərinin səhmdarları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin BOTAŞ və Almaniyanın RWE şirkətləridir.