Azərbaycan, Bakı, 14 iyun /Trend/
Yanvar-mayda Azərbaycanda 20 milyon tona yaxın neft və kondensat hasil olunub ki, bu da 2010-cu ilin analoji dövr göstəricisindən 5 faiz azdır. Bu barədə çərşənbə axşamı Dövlət Statistika Komitəsindən məlumat verilib.
2010-cu ildə Azərbaycanda cəmi 50,83 milyon ton neft hasil olunub.
Ötən il neft hasilatının əsas həcmi xarici tərəfdaşlarla birgə işlənən "Azəri-Çıraq-Günəşli" yataqlar blokunun və "Şahdəniz" qaz-kondensat yatağının payına düşüb.
Yanvar-mayda Azərbaycanda qaz hasilatı 10,7 milyard kubmetrdən artıq təşkil edib ki, bu da 2010-cu ilin analoji dövr göstəricisindən 2,6 faiz azdır. Yanvar-mayda əmtəə qazı 6,8 milyard kubmetrdən artıq hasil olunub ki, bu da ötən ilin analoji dövr göstəricisindən 5,9 faiz azdır.
Ötən il respublikada 26,23 milyard kubmetr qaz hasil olunub ki, bunun da 16,67 milyardı əmtəə qazının payına düşüb.
Yanvar-mayda Azərbaycanda 8,7 milyard kilovat-saata yaxın elektrik enerjisi istehsal olunub. Bu, 2010-cu ilin analoji dövr göstəricisindən 6,2 faiz çoxdur.