Azərbaycan, Bakı, 19 sentyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) və Almaniyanın E.ON şirkəti ilin sonunadək Bakı və Abşeron yarımadasının paylayıcı qaz sisteminin texniki-iqtisadi əsaslandırmasının hazırlanması, layihələşdirilməsi (qaz kəmərlərinin uzunluğunun ölçülməsi), yenidən qurulması və modernləşdirilməsi üzrə müqavilə imzalayacaq. Bu barədə Trend-ə bazar ertəsi "Azəriqaz" İB-nin rəhbəri Əkbər Hacıyev deyib.
Bakı və Abşeron yarımadasının qaz sistemi ölkədə ən iri sistemdir və təxminən 650 min abonenti əhatə edir. Onun yenidən qurulması və müasirləşdirilməsi üçün mövcud infrastrukturun 90 faizi yenilənməlidir.
"Müqavilə bu layihə üzrə birinci mərhələnin işlərini yerinə yetirməyi nəzərdə tutur. Təfsilatlı mühəndislik işlərinin aparılmasını və tikintinin başlanğıcını nəzərdə tutan layihənin ikinci mərhələsinə gəlincə, bununla bağlı ayrıca müqavilə bağlanacaq", - Hacıyev deyib.
Layihənin ilkin qiyməti 800-900 milyon avro təşkil edir.
