Azərbaycan, Bakı, 28 noyabr /Trend, müxbir E.İsmayılov/
Bakıda gün ərzində qazın qeyri-bərabər paylanması şəhərin qaz nəqliyyatı infrastrukturunun imkanlarının artan tələbata uyğun gəlməməsi ilə bağlıdır. Bu barədə bazar ertəsi Trend-ə ARDNŞ-dəki mənbə məlumat verib.
Onun sözlərinə görə, gündüz saatlarında qazın təzyiqinin azalması qazın verilməsində səhər, gündüz və axşam rejiminin tətbiqi ilə bağlıdır. Səhər və axşam saatlarında qazın yüksək təzyiqi məhz bu müddətdə böyük həcmdə qaza tələbatın olması ilə əlaqədardır.
"Lakin şəbəkədə qazın azalmasının başqa obyektiv səbəbləri də var", - mənbə qeyd edib.
Onun sözlərinə görə, Bakının və Abşeron yarımadasının qazpaylayıcı şəbəkəsi köhnəlib, genişlənmiş şəhər və qaz istehlakçılarının sayının xeyli artmasına hesablanmayıb. Yeni evlərin tikintisi, şəbəkəyə yeni abunəçilərin qoşulması sistemin qaza olan tələbatı tam olaraq ödəyə bilməməsinə gətirib çıxarıb.
"Və ona görə də hazırda vəziyyətin dəyişdirilməsi ilə bağlı işlər görülür", - mənbə deyib.
Azərbaycan əraisində qazın nəqli və paylanması məsələləri ilə ARDNŞ-nin "Azəriqaz" İstehsalat Birliyi məşğul olur.
