Azərbaycan, Bakı, 12 aprel /Trend, müxbir E.İsmayılov/
İspaniyanın "Alten Group" şirkəti Avropa Komissiyasının enerji sahəsində maliyyələşdirdiyi islahatlar proqramı çərçivəsində Azərbaycanda pilot layihələrin texniki-iqtisadi əsaslandırılmasını (TİƏ) hazırlayır. Trend-in məlumatına görə, bu barədə cümə axşamı Alternativ və Bərpa Olunan Enerji Mənbələri üzrə Dövlət Agentliyinin rəhbəri Akim Bədəlov mətbuat konfransında bildirib.
Mətbuat konfansı Avropa Komissiyasının enerji sahəsində islahatlar proqramına dəstək üçün 13 milyon avro həcmində qrantın istifadə edilməsi üzrə proqramın ikinci mərhələsinin başlamasına həsr edilib.
Layihələr alternativ enerjinin külək, günəş enerjisi və biokütlələrin istifadə edilməsi kimi sahələrini əhatə edəcək. Xüsusən, şirkət kiçik çayda su elektrik stansiyasının tikintisi layihəsinin TİƏ-ni hazırlayır.
Bədəlovun sözlərinə görə, tender çərçivəsində işlərin dəyəri 500 min avro həcmində qiymətləndirilir.
TİƏ-nin hazırlanmasının tamamlanmasından sonra bu pilot layihələri reallaşdıracaq şirkətlərin seçimi üçün müvafiq tenderlər elan ediləcək", - agentlik rəhbəri qeyd edib.
Aİ-nin proqramı çərçivəsində alternativ elektrik enerjisi mənbələrinin inkişafı üzrə fəaliyyət planının hazırlanması nəzərdə tutulub. Həmçinin, enerjidən istifadənin səmərəliliyini artırmaq üçün qanunvericiliyin təkmilləşdirilməsi, bu sahədə dövlət maliyyəsinin idarə edilməsi sisteminin, enerji sektorunda statistikaların təkmilləşdirilməsi nəzərdə tutulur.