Azərbaycan, Bakı, 21 yanvar /Trend, müxbir E.İsmayılov/
Hazırda ölkə ərazisində isti hava şəraitinin müşahidə olunmasına baxmayaraq, qaz istehlakının səviyyəsi yüksək olaraq qalır. Bu barədə bazar ertəsi Trend-ə ARDNŞ-nin "Azəriqaz" İstehsalat Birliyindən bildirilib.
Məlumata görə, Azərbaycanda əhaliyə verilən qazın gündəlik həcmi 22,5 milyon kubmetr təşkil edib.
Əhaliyə gündəlik verilən qazın ümumi həcmindən 13 milyon kubmetr Bakının payına düşüb.
"Başqa regionlarda əhaliyə gündəlik qaz satışı 9,5 milyon kubmetr səviyyəsindədir", - İB-dən bildirilib.
"Azəriqaz"dan deyilib ki, satılan qaz həcmləri tələbatla müəyyən edilir və istehlakçıların tələbatını tam ödəyir.