Azərbaycan, Bakı, 12 avqust /Trend, müxbir Təmkin Cəfərov/
Azərbaycan İran ərazisindən Naxçıvan Muxtar Respublikasına qaz ötürülməsinin həcmini artırmaq istəyir. Bu sözləri İranın neft nazirinin beynəlxalq məsələlər üzrə müavini Əli Macedi deyib. Trend-in məlumatına görə, bu barədə İRNA agentliyi məlumat verir.
Ə.Macedi deyib ki, Azərbaycan bu məsələ ilə bağlı İrana müraciət edib.
Onun sözlərinə görə, hazırda Azərbayandan Naxçıvan MR-ə ildə bir milyard kubmetrdən az həcmdə qaz ötürülür: "Azərbaycanın bu təklifi ilə biz razıyıq və yaxın vaxtlarda keçiriləcək görüşdə bu məsələ ətraflı müzakirə olunacaq".
İran və Azərbaycan arasında qaz ötürülməsi ilə bağlı müqavilə 2005-ci ildə imzalanıb. 25 il müddətinə imzalanan müqaviləyə əsasən İran Azərbaycandan qazı Astarada (İran) təhvil alır və Naxçıvanda təhvil verir. 2013-cü ildə Azərbaycandan İran vasitəsi ilə Naxçıvan MR-ə 424 milyon kubmetr qaz ötürülüb.
