Azərbaycan, Bakı, 5 iyun /Trend/
Azərbaycan və İndoneziyanın Energetika nazirlikləri birgə bəyannamə imzalayıblar. Bəyannamə iki ölkə arasında enerji əməkdaşlığı üçün baza olacaq. Bunu Trend-ə İndoneziyanın energetika və mineral ehtiyatlar naziri Sudirman Said deyib.
Nazir bilidirib: "Biz xüsusi nümayəndələrin təyin edilməsində razılığa gəldik və bu işçi qrupları tezliklə görüşlər keçirəcəklər. Görüşlər əməkdaşlığımızın genişləndirilməsinə yardım edəcək".
S.Said qeyd edib ki, Azərbaycan rəhbərliyi ilə səmərəli görüşlər keçirib: "Görüşlərdə iki ölkə arasında əməkdaşlığın möhkəmləndirilməsi imkanlarını müzakirə edildi".
Onun sözlərinə görə, Azərbaycan İndoneziyanın enerji infrastrukturunun inkişafına yardım edə bilər: "Biz istehsal etdiyimizdən daha çox istehlak edirik, buna görə də Azərbaycanla enerji əməkdaşlığını inkişaf etdirməliyik".
Nazir diqqətə çatdırıb ki, Azərbaycana şaxələndirmə lazımdır və İndoneziya buna yardım edə bilər.