İyunun 21-22-də Praqada Beynəlxalq qazma müqaviləçiləri Assosiasiyasının (International Association of Drilling Contractors - IADC) təşkil etdiyi sərgi və konfrans keçiriləcək.
Trend bildirir ki, IADC-ın məlumatında digər məruzəçilərlə yanaşı BP Exploration şirkətinin nümayəndəsi Rüfət Məmmədbəyli və BJ Services şirkətinin nümayəndələri Cos Reyes və Patrisio Torresin də çıxış edəcəyi qeyd olunur. Onlar "Mərkəzi Azəri" platformasının dayaz hissəsində köpük sementlənməsi barədə danışacaqlar.
Xəzərin bir çox ehtiyatlarında olduğu kimi, bu yataqda da quyuların quyuağzı seqmentləri xeyli geoloji təhlükələrə məruz qalıb, qazma məhlullarının və sementlənmənin tətbiqi proqramı çərçivəsində bunlardan qorunmaq lazımdır. "Bu təhlükələr Abşeron formasiyasının dayaz hissələri, dayazlıqda aşağı temperatur və palçıq vulkanlarını əhatə edir" -deyə məlumatda qeyd olunur.
Təqdimatda "Mərkəzi Azəri" platformasında köpüklü sementin ilkin planlaşdırılması, sahə sınaqları və uğurlu tətbiqi məsələləri müzakirə ediləcək.