"Günəşli" yatağının dərinsulu (Azərbaycan Beynəlxalq Əməliyyat şirkəti tərəfindən işlənir) və dayaz hissələri (AR DNŞ tərəfindən işlənir) arasında hidrodinamik əlaqələr yoxdur. Beləliklə, təzyiqin saxlanması üçün yatağın dərinsulu hissəsində suyun vurulması hasilat zamanı problem yaratmayacaq. Yataqlar arasında əlaqənin olmamasını burada aparılan seysmik və geofiziki araşdırmalar təsdiqləyir. Bu barədə Trend ə Sənaye və Energetika Nazirliyinin mütəxəssisləri məlumat verib.
Hazırda ABƏŞ hasilat və sualtı su vurulması üçün öncəqazma quyularının qazılmasını həyata keçirir. Yataqda su vurulması üçün 10 quyunun qazılması nəzərdə tutulur.
"Faza-3" çərçivəsində "Günəşli" yatağının dərinsulu hissəsindən birinci neftin 2008-ci idə hasil ediləcəyi gözlənilir.
Yatağın dərinsulu hissəsindən çıxarıla bilən ehtiyatlar 176 mln ton və ya 1,25 mlrd barel neft təşkil edir.
