Yaxın vaxtlarda qazın "Azəriqaz" QSC-nin qazın nəqli sisteminə qəbulu üçün zəruri olan Səngəçal-Qaradağ-Hacıqabul qaz kəmərinin inşası layihəsinin texniki-iqtisadi əsaslandırılmasının hazırlanması prosesi başa çatacaq. Trend in xəbər verdiyi kimi, bu barədə jurnalistlərə QSC-nin sədr müavini Nazim Səmədzadə məlumat verib.
Səngəçal-Qaradağ-Hacıqabul qaz kəmərinin uzunluğu 68 km təşkil edəcək. İlkin qiymətləndirmələrə görə, layihənin gerçəkləşdirilməsi üçün $45 mln lazımdır.
N.Səmədzadə qeyd edib ki, hazırda "Azəriqaz" sistemi "Şahdəniz" yatağından birinci mərhələdə nəzərdə tutulan həcmdə - sutkada 10 mln kub metr qaz qəbul edə bilər. 2007-ci ildə QSC sistemi yataqdan Azərbaycana veriləcək bütün qazı, o cümlədən "Azəri" yatağından səmt qazını qəbul edə biləcək.
