İqtisadi İnkişaf Nazirliyi yanında yaradılmış Təhvil-təslim üzrə dövlət komissiyası "Bakı elektrik şəbəkəsi" və "Sumqayıt elektrik şəbəkəsi" səhmdar cəmiyyətlərində inventarlaşdırmanı davam etdirir. Bu barədə Trend ə komissiyadan məlumat verilib.
2001-2002-ci illərdə bu şəbəkələrin Barmek Holding şirkətinin idarəsinə verilməsindən sonra "Bakı elektrik şəbəkəsi"nin bazasında Barmek Azerbaijan şirkəti yaradılıb və hər iki şəbəkənin aktivləri həmin şirkətin balansına verilib.
Azərbaycan prezidenti İlham Əliyevin "Bakı elektrik şəbəkəsi" ASC və "Sumqayıt elektrik şəbəkəsi" ASC-nin fəaliyyətinin səmərəliliyinin artırılmasının təmin edilməsi üzrə tədbirlər haqqında 11 avqust 2006-cı il tarixli sərəncamına görə, İİN -ə həmin ASC-lərin fəaliyyətinin təmin olunması, onların fəaliyyət göstərdiyi ərazilərdə istehlakçıların enerji təchizatının yaxşılaşdırılması və istifadə olunan elektrik enerjisinin dəyərinin ödənilmə səviyyəsinin artırılması üzrə tədbirlər görmək həvalə olunub.
Komissiyadan bildirilib ki, Bakı şəhərinin 11 rayonu üzrə inventarlaşdırma proseduru 80%, Quba, Xaçmaz, Qobustan və "Sumqayıtelektrikşəbəkə"nin xidmət etdiyi bağ ərazilərində isə - 60% yerinə yetirilib.