Noyabrın 20-dən 28-dək Asiya İnkişaf Bankının enerji sektoru üzrə mütəxəssisi Tianhua Leonun başçılığı ilə bankın missiyasının Azərbaycana səfəri planlaşdırılıb. Hökümətdən Trend ə verilən xəbərə görə, missiyaya AİB-in Azərbaycanda elektrik enerjisinin alternativ mənbələrinin tətbiq edilməsi üçün texniki yardım layihəsi üzrə məsləhətçisi olan Entec İsveçrə -Hindistan konsorsiumunun nümayəndəsi daxil olacaq. Səfər zamanı məsləhətçinin yerləşmə yeri ilə bağlı məsələ həll olunacaq, eləcə də layihənin reallaşdırılması üçün yerli məsləhətçinin cəlb olunması məsələsinə baxılacaq.
Müxtəlif yolları müəyyən etmək məqsədilə tədqiqatların aparılması və elektrik enerjisinin bərpa edilən mənbələrinin inkişafı üzrə potensial üçün 900 min ABŞ dolları ayrılıb. Bunun 200 min ABŞ dolları Finlyandiya höküməti, 500 min ABŞ dolları - AİB, 200 min ABŞ dolları isə Azərbaycan höküməti tərəfindən qrant qismində təqdim olunub. Qrant sazişi 26 may 2006-cı ildə imzalanıb.
Texniki yardım 10 ay müddətinə nəzərdə tutulub. Layihənin hazırlığı tamamlandıqdan sonra Asiya bankı onun reallaşdırılması üçün 40 mln. ABŞ dolları həcmində kredit təqdim etməyi planlaşdırır. Kreditin bir hissəsi (25 mln. ABŞ dolları) güzəştli şərtlərlə, 15 mln. ABŞ dolları isə adi şərtlərlə veriləcək.
Layihənin əsas məqsədi külək dəyirmanları, minihidravlik və günəş enerjisindən istifadə etməklə, ölkə bölgələrini enerjinin alternativ mənbələri ilə təmin etməkdən ibarətdir. Bu, bölgələrdə kənd təsərrüfatı fəaliyyətinin dəstəklənməsi üçün zəruridir.
