Hazırda "Azəri"-"Çıraq"-"Günəşli" yataqlarında neft hasilatının sutkalıq həcmi 600 min bareldən çoxdur. Bu barədə Trend ə "AÇG" yatağını işləyən ABƏŞ-in operatoru BP Azerbaijan şirkətindən məlumat verilib.
Noyabrın 28-nə olan məlumata görə, "Azəri" yatağının mərkəzi hissəsində hasilatın həcmi 263 min barel, qərb hissəsində - 151,4 min barel, şərq hissəsində - 69,3 min barel və "Çıraq" yatağında - 138 min barel təşkil edib.
Hazırda neftin əsas həcmi BTC ixrac boru kəməri ilə nəql edilir. Bu marşrutla sutkalıq nəql vaxtaşırı 500 min bareli keçir. Nəqlin həcmi sabit deyil. Belə ki, kəmərin Türkiyə hissəsində bir sıra işlər görülür.
Neftin bir hissəsi Bakı-Novorossiysk boru kəməri ilə nəql edilir və dəmir yolu ilə Gürcüstanın Qara dənizdə yerləşən Batumi limanına göndərilir.
