Azərbacyan,Bakı/müxbir Trend S.Əliyev/Azərbacyan Dövlət Neft Şirkəti (ADNŞ) Tailandın PTT Public Company Limited şirkətinə Türkiyənin Ceyhan limanından yüngül neft partiyasını iri tankerlə 7-10 may tarixində göndərməyi planlaşdırır. Bu barədə ADNŞ-dən məlumat verilib.
Partiyanın həcmi 600 min - 1 mln. barr. Azeri Light neftidir.
"Göndərilmənin dəqiq tarixi hələ dəqiqləşdirilir", ADNŞ-dən qeyd olunub.
Azərbacyan Dövlət Neft Şirkəti Tailandın PTT şirkətinin neft emalı zavodlarına ayda 1 mln. barr. neftədək Azeri Light nefti göndərəcək. Bu proses ADNŞ və PTT arasında fevralın 28-də imzalanmış uzunmüddətli müqavilə çərçivəsində həyata keçiriləcək. Müqavilənin müddəti 1 ildir. Neft Bakı-Tiflis-Ceyhan boru kəməri vasitəsilə çatdırılan FOB və ya CFR Ceyhan şərtləri ilə göndəriləcək.
PTT Public Company Limited şirkəti Tailandın neft və qaz hasilatı, emalı, nəqletmə və neft məhsullarının idxalı və ixracı ilə məşğul olan iri neft şirkətidir.
Şirkətin Tailandın sutkalıq emal gücü 925 min barrel təşkil edən dörd nefr emalı zavodunda iştirakçı payı var.
Hazırda ADNŞ Ceyhan limanından öz neftinin birbaşa çatdırılması barədə əsasən ABŞ və Uzaq Şərqdə danışıqlar aparır.
ADNŞ yüngül nefti 1994-cü ildə imzalanmış "Əsrin Müqaviləsi" çərçivəsində "Azəri-Çıraq-Günəşli" yatağından hasil edir.
