Azərbaycan, Bakı/ Trend müxbir İ.Xəlilova/ Azərbaycan Dövlət Neft Fondu və Maliyyə Nazirliyi arasında 11 avqust 2006-cı ildə umzalanmış razılaşmaya əsasən, bu günə ARDNF xüsusi hesabına büdcə daxilolmaları üzrə valyuta qalığı 700 mln. dollar təşkil edir. Bu barədə Neft Fondunun icraçı direktoru Şahmar Mövsümov bildirib. İlin əvvəlindən bu vəsaitlər dəyişilməz olaraq qalır. Belə ki, Maliyyə Nazirliyi verilmiş vəsaitdən büdcə ehtiyacları üçün istifadə etməyib.
Amma dövlət büdcəsinin qalıq profisitindən vəsaitlər hələ ARDNF-ə köçürülməyib. Sxem belədir ki, ilk növbədə ötən ilin büdcəsinin icrası təsdiq olunmalıdır.
2007-ci ilin təsdiq olunmuş büdcəsinə görə, onların xərclərinin 1/12 hissəsi tutulduqdan sonra profisit müəyyən olunarsa, qalıq vəsait Dövlət Neft Fonduna köçürülür.
2006-cı ilin dövlət büdcəsinin icrası may ayında parlamentdə təsdiq olunacaq.
Maliyyə Nazirliyi 2007-ci ildə də büdcəyə valyuta daxil olmalarını Neft Fondunun idarəçiliyinə verməyi davam etdirəcək. Bu vəsaitlər həmçinin xarici valyuta ilə qaytarılır. Lakin daha öncə büdcə vəsaitlərinin Neft Fondu vasitəsilə konvertasiya edilməsi nəzərdə tutulurdu. Amma hökumət bu sxemlə razılaşmadı və hazırda Nazirlik konvertasiyanı valyuta bazarında özü həyata keçirir. Nazirlər Kabinetinin bir müddət öncə verdiyi əmrə əsasən, Maliyyə Nazirliyinə bəzi xərcləri xarici valyuta ilə həyata keçirməyə icazə verilir.
