Azərbaycan, Bakı, 02 sentyabr / Trend , müxbir H.Vəliyev /
Azərbaycanın Rabitə və İnformasiya Texnologiyaları Nazirliyi respublikada kosmik sənayenin yaradılması layihəsi çərçivəsində koordinasiya şurasının təşkili barədə qərar qəbul edib. Bu barədə idarənin məlumatında deyilir.
Rabitə Nazirliyinin məlumatına əsasən, koordinasiya şurasının tərkibinə layihədə iştirak edən tərəflərin nümayəndələri daxil olacaq. Məsələ bu gün nazirlikdə rabitə və informasiya texnologiyaları naziri Əli Abbasovun başçılığı altında keçirilən bağlı kollegiya iclasında nəzərdən keçirilib. İştirakçılar kadr potensialının formalaşdırılması üzrə həyata keçirilən işlərin vacibliyini qeyd ediblər.
Azərbaycanın planlarına orbitə iki sputnikin buraxılması daxildir. Birinci sputnikin buraxılması 2011, ikinci isə 2012-ci ilə planlaşdırılıb.
Layihənin dəyəri 163 milyon manat təşkil edir. Sputnikin inşası üzrə işlərə sentyabrda başlanılacaq. Sputnik orbitə Baykonur (Qazaxıstan) kosmodromundan buraxılacaq.
Sputnikin yaradılması üzrə tender bu ilin yanvar ayında Azərbaycan Prezidenti İlham Əliyevin 2008-ci ilin sonunda imzaladığı "Azərbaycan Respublikasında kosmik sənayenin yaradılması və orbitə telekommunikasiya sputniklərinin çıxarılması haqqında" sərəncamına əsasən elan edilib.
Tenderin qalibi Orbital Sciences Corp (ABŞ) şirkəti olub.
Milli sputnikin olması ölkəyə keyfiyyətli və etibarlı rabitənin, teleyayımın təşkili, həmçinin rabitə kanallarının sayının artırılmasına imkan verəcək. "Azerspace" sputniki Avropa və Asiya ərazisini əhatə edəcək ki, bu da kanalların yayımında respublikanın tranzit ölkə kimi çıxış etməsinə imkan verəcək.
Hazırda "Azerspace"-in geostasionar orbitdə yerləşdirilməsi üçün ITU (International Telecommunication Union) lisenziyası alınıb.
Sputnikin istismara verilməsi tarixi 15 il təşkil edir. Azərbaycan sputnikin 20 faiz resurslarından istifadə etmək niyyətindədir. Qalan hissə isə digər ölkələrin operatorlarına təklif ediləcək.
Məqalə müəllifi ilə əlaqə ünvanı: [email protected]
